Contact Hanlie at hanlie@sadogood.co.za.

Back to Hanlie's Blog

HOOFSTUK 20:

Verneder jouself:   My ma’t my geleer mens bid nie dat God jou moet nederig maak nie, jy beklee jouself met nederigheid. As jy bid daarvoor dan hoor die Here en die beantwoording van die gebed is, … wel een of ander vernederende ervaring… en dis nie lekker nie. Ek het dit in my studentejare beleef. Ek was jonk en voortvarend, maar toe my hart aangeskakel kom vir God, lees ek eendag ‘God haat hoogmoed’. Ek onthou hoe ek op kampus gestap het en opgekyk het en ‘n groot soliede wolk in die lug gesien het. Voor ek my kon keer bid ek: ‘Here soos hierdie wolk tussen my en die blou lug is, so weet ek hoogmoed is tussen my en U. Neem dit weg, want ek wil nie hê daar moet iets tussen ons wees nie’. Die ervaring wat daarna gevolg het, het juis dit tot gevolg gehad. ‘n Warrelwind romanse met die verkeerde kêrel, wat my in situasies laat beland wat ek ander oor veroordeel het. En daar het ‘n lang pad begin van kies om myself te verneder.

Op die regte tyd sal Hy jou verhoog

Op pad na Ermelo luister ons RSG. Elvis Blue is Amoré se gas op Tjailatyd. Een van die 2 cd’s wat ons op Bela-Bela geskenk gekry het by Tobie en Mara van die padkafee, was van Jan Hooggendyk, uitgegee in 2009, voordat hy Idols gewen het. Dis ‘n gospel cd van liedjies wat Jan self geskryf het. Sy nederige hart en hoe hy homself voor God se voete in oorgawe verneder is opvallend. Ironies genoeg is dit juis Jan se lied ‘Stil’ wat gespeel het oppad na die Spar in Letsitele, waar ek gekonfronteer is met my eie hoogmoed.

Stil

As ek stil by U voete kom kniel                                             

Enkel gebroke siel

U genees wat breek

Wanneer ek by U voete kniel

As ek weer by U voete kom buig

Met ‘n hart wat hard wil juig

U die Een wat hoor

Wanneer ek by U voete kom buig

Dankie dankie aan die Een                                                      

Wat my omring

Nie ‘n duisend woorde spreek hoe ek voel oor U

As ek huiwerig my offers bring

Want my offers is so min

U die Een wat gee

Al die offers wat ek bring

As ek skaam by U voete kom val

En my sondes my inhaal

U kom bring die lig

Wanneer ek voor U voete kom val

Dit raak my veral in die lig van Murray se boekie oor nederigheid. Die gedagte wat Murray beklemtoon is, verneder jouself onder die magtige hand van God en op die regte tyd sal Hy jou verhoog. Elvis vertel in die onderhoud hoe hulle ‘down en out’ was. Die bank het gebel, sy handsakstalletjie op die KKNK het niks verkoop nie, sy kar was gebreek en hy moes by sy pa geld leen om sy motor te herstel. Kortom, hy was die ou wat sy ma altyd gesê het om nie te wees nie. Op daardie stadium het hy al die teleurstelling beleef, ook met 5 cd’s waarvan net 5 eksemplare verkoop het.  Toe natuurlik die Idols oudisie…die res is geskiedenis. Klink my of hy op die regte tyd, deur ‘n Magtige hand verhoog is.

Back to Hanlie's Blog