Contact Riaan at riaan@sadogood.co.za.                                           Back to Riaan's Blog

Ek is Riaan de Lange.  Ek en my gesin toer sedert Januarie 2012 deur die land.  Ons besoek dorpe en stede en soek die mooi in Suid-Afrika se mense.  Dit gaan dus nie soseer oor gebeurtenisse en besienswaardighede nie – ons soek mense – mense wat goed doen aan ander en aan ons land.  En daar is baie!  Besoek ons op www.sadogood.co.za vir meer detail.  Lees die Blog’s en spesifiek ook die “link” na “DROOM”. 

Oudtshoorn & George

22 Junie tot 2 Julie 2012:  Ons plan was nie om so lank te bly nie, maar hoe anders met sekerlik die mees gasvrye mense wat ek persoonlik ken, Johan en Mindie Breunissen!  Dit was nog altyd so. Hul ken nie die einde van gee en deel nie.  Hul gaan uit hul pad om jou soos die belangrikste gas ooit te laat voel – vir my, Hanlie en ons 4 kinders.  Wys my iemand wat maklik 6 mense vir 9 dae verduur in hul huis op hul plaas so 15 km buite Oudtshoorn oppad na Calitzsdorp.  Ook is ons eenvoudig “ingeblend” by hul vriendekring.

Op Vrydag 22 Junie 2012 was ons deel van so 40 mense wat Kersfees in Junie gevier het.  Elkeen bring ‘n kombers.  Aan die einde van die ete op Rietfontein word die kombuispersoneel geroep en die geskenke oorhandig.  Hul monde het oopgeval en –gehang!

Tydens die ete sluit Lili Schoeman en Marieza van Zyl by ons aan.  Lili verjaar en hulle 2 saam nog 5 mense kom ook op die plaas bly vir die naweek!?  Lank gelede het Lili die wens uitgespreek dat as sy verjaar, sal sy dit op die plaas wil doen – en hier is sy!  No problem.  Water, krag, koffie, kos, skottelgoed, ens. maak nie saak nie.  Ons kuier, eet, gesels en reis ... In die week kom eet Lizette en Lee-Ann saam ons; dan Leon en Dorethea; en dan Christof en Toppa.  Pampoenkoekies, wildsboud, wyn, en lekker gesels.

Surval landgoed, Grundheim Wynlandgoed, die Uhuru warmbronne (naby Calitzdorp) waar ons in die ysige koue in warm water swem, Karusa wyne (Karusa beteken plek met min water – verbuiging van die woord Karoo), pekanneutplaas (ons sien hoe word die neute geoes deur dit kragtig van die bome te skud), koffiewinkels (Café Brulé waar ek talle van Johan se mansvriende ontmoet en ons groot stukke gesels en selfs die land se probleme oplos! – baie positeif), piekniek op die Swartbergpas, ens. 

Ons almal trek nader aan hul seun, Zihan (1 jr oud) en raak lief vir hom. Die kinders ry onbeperk quad bike, en as dit breek maak Johan reg, en weer ry hulle.  Hul skiet windbuks – ook onbeperk.  Onvergeetlik.  Hulle kon nie ‘n beter vakansie gevra het nie na die 3 weke eksamen wat geskryf is in ‘n nat en koue George. 

Intussen het ek onbeperkte toegang tot Johan se kantoor waar ek kan werk, fakse stuur, e-posse en internet doen, en afdrukke maak.  Hy (en sy personeel) soek niks vergoeding nie.  Toe ek skelm probeer betaal sê die personeel hulle sal hul werk verloor as hul my laat betaal!!   

Ons kon ook eet en kuier saam Mirieka en George, asook Mia en Amé – lekker groot vuur buite in erf gemaak en in koue sit en warm word een Sondagaand - met die beste moontlike rooiwyn van George. Ons het ook saam hulle na ‘n wêreld bekende violis en pianis gaan luister as een van die Oudtshoorn musiekvereniging se gala-aande, en lekker saam hulle geëet daarna. Ook het hulle 2 verseker dat Adriaan sy vlak 3 noodhulpkursus saam Amé voltooi vanaf Maandag tot Donderdag en die eksamen slaag – welgedaan!  Die kursus is by George se huis aangebied.  Vrydag het ons ook gholf gaan speel saam George op die Oudtshoorn Gholfbaan – lekker! 

Uiteindelik kon ek darem iets betaal vir Johan en Mindie toe ons hulle 2 kon uitvat vir ete op Vrydag 29 Junie – by Kookpot, nuwe restaurant.  Ek betaal R950.  Dis baie, maar watter prys heg ek aan hulle 2 se gasvryheid.  Dis priceless!   

Toe ons ry op Maandag 2 Julie sing ek saggies en alleen in die huis “Let Your glory fill this house…”  Dis my gebed vir hul huis en mense.

GEORGE: Op 16 Junie 2012 vat ek my gesin na een van my universiteitsvriende, Willie Gouws.  Ons was saam by die Universiteit van Port Elizabeth (nou die Nelson Mandela Metropolitaanse Universiteit).  Beide het ons vroue daar ontmoet.  Ons het mekaar maar min gesien sedert 1992, maar die afspraak was ons kom kuier wanneer ons deur George ry.  Hier is ons!  Die Springbokke speel. Hester ontvang ons hartlik. Ek was seremoniemeester by hul troue en Willie was ons strooijonker.

Water: Willie vertel van sy werk. Die detail en formules verstaan ek nie, want ek is nie wiskundig nie, maar strategies besef ek watter belangrike werk hy doen.  Lanklaas het ek iemand gesien so opgewonde oor sy werk, en sy vrou is 100% agter hom (sy werk saam met hom).  Hul ontwikkel assumulasies (formules en aannames in my taal) vir die spaar van miljoene liter water, en in die proses miljoene Rande vir kliënte.  Die volgende wêreldoorlog is mos juis oor water – nie land, minerale of strategiese seeroetes nie… of hoe?   

Waar ander konsultante se modelle voorskryf dat die myne goedkoop water moet koop en opdam, sê Willie water in SA is skaars, bewaar dit, beplan myne se optimale gebruik oor ‘n periode van 15 of 20 jaar, moenie dat water opdam of oorloop of verdamp nie – en so word miljarde liters water jaarliks gespaar.  Willie is regtig besorg oor water in SA.  Op hierdie manier help hy nie net homself en kliënte nie, maar ook vir my en jou, en die hele SA. 

Ek luister aandagtig na Willie soos hy sy werk verduidelik en besef die man het nie een korrupte of gierige haar op sy kop nie.  Wat jy sien is wat jy kry – ‘n man van integriteit.  Suid-Afrika het baie sulke mense nodig, veral om met ons strategiese hulpbronne te werk.  Suid-Afrika het wonderlike mense.

Back to Riaan's Blog